İstanbul Ağası Salih Ağa tarafından saraylara verilecek odun, kütük ve kömür masraflarının karşılanması için Honaz, Şeyhli ve Eşme kazalarının bedel-i nüzül vergilerinden mahsup edilmek üzere toplam üç bin yüz kırk altı kuruşun ilgili kazalardan tahsil edilerek biran önce gönderilmesi emrini havi Kütahya, Honaz, Şeyhli ve Eşme kazaları kadılarına ve Kütahya mütesellimine gönderilen hüküm.       Kütahya, Honaz, Şeyhlü ve Eşme kazalarının kuzat ve nüvvabına ve Kütahya Mütesellimine hüküm ki;           İstanbul Ağası Salih zide mecduhunun rikab-ı hümâyunuma takdim eylediği arzuhali mefhûmunda Saray-ı Cedîd-i Âmire'mve Saray-ı Ârîk-i Ma'mûre'm ve Galatasaray-ı Hümayun'um ve göç-i hümayunum ta'yînâtı ve mu'ayyenat-ı sâireye ağa-yı mûmâ-ileyh ma'rifetiyle külle yevm verilecek hatab, kütük ve kömürün icâb eden bahâ ve masârıf-ı sâiresi için bin iki yüz üç ve dört senelerine mahsûben Şeyhlü kazasınına tâbi' Menteş ve gayruhü karyesinin avarız-ı nüzül maktü'u mâlından iki kıt'a sebeb-i tahrir hükümleri mûcebince beş yüz yirmi kuruş ve seneteyn-i mezbûreteyne mahsüben Honaz kazasînın avârız-ı nüzül maktû'u malından iki kıt'a sebeb-i tahrîr hükümleri mûcebince bin beş yüz kuruş ki altı kıt'a sebeb-i tahrîr ahkâmı mûceblerince cem'an üç bin yüz kırk altı kuruş havâle ve ta'yin olunup meblağ-ı mezbûru yerli yerinden tahsil murâd eyledikte edâsında ta'allül ve muhâlefet üzere olduklarından umûr-ı mezkûrenin te'hir ve ta'tiline bâ'is ü bâdi olduğundan mübâşir ta'yînine muhtâc idiğini beyân birle (...) (...) Nüvvâb-ı mûmâ-ileyhimsiz fermânım olduğu vechile meblağ-ı mezburun tahsîl, teslim ve tesbîli husûsuna siz dahi mezîd-i ihtimâm ü dikkat eylemeniz bâbında fermân-ı âli-şânım sâdır olmuştur.                                                                                                                                         Fi 10 S. sene 1205 Ferman 1 (Bir) adet yazılmıştır. 10 Safer 1205(19 Ekim 1790) İsti'cali için evamir-i şerîfesi tesvid oluna.          Devletlü inâyetlü merhametlü sultanım hazretleri sağ olsun.           İdâresi ihde-i çakerîde olan İstanbul Ağalığı havâlâtlarından Kütahya Sancağında vâki' kazâların avârız-ı maktû'unun iki yüz üç ve dört seneleri mallarından altı kıt'a sebeb-i tahrîr ahkâmı mûceblerince havâle olunan bâlâda mastûr olan cem'an üç bin yüz kırk bin kuruş mahallerinden tahsili mûrad olundukta edâsında ta'allül ve muhâlefet üzere olunduklarından umûr-ı mezbûrun ta'til ve te’hîrine (...) (...) Kütahya Mütesellimine hitaben mübaşirli müekked ferman-ı ali-şan inayet ve ihsan buyurulmak babînda emr ü ferman devletlü inâyetlü sultânım hazretlerinindir. Bende Salih Ağa-yi İstanbul hâlâ 10 Safer 1205(19 Ekim 1790) Mustafa UYSAL Araştırmacı-Yazar Kaynakça:” Osmanlı Belgelerinde Kütahya” Sayfa: 340-341-342-343