Şûra-yı Devlet - 6 Nisan 1919 (5 Recep 1337) Maliye ve Nâfi'a Aded: 36873/24                 Kütahya Sancağı'nın Gümüş Nahiyesine tâbi' Seyidömer Karyesi'nin Kavaklıpınar mevki'inde bi't-taharrî zahire çıkarılan linyit kömür ma'deninin Kürd-zâde İbrahim Ağa ile Yamalı-zade Hüsnü Bey uhdesine ihâlesi hakkında Ma'adin Müdîriyet-i Umûmiyesi'nden tanzim kılınan mazbatanın ve mukâvelenâme ve şartnâme lâyihalarıyla harita-i mevki'iyyenin takdîmiyle istîzânı mutazammın Ticâret ve Zirâ'at Nezâreti'nin Şûrâ-yı Devlet'e havâle buyurulan 28 Teşrîn-i evvel sene (1)334 târih ve husûsî iki yüz kırk numarolu tezkiresi melfûfuyla Mâliye ve Nâfi'a Dâiresi'nde kırâet olundu.        Mezkûr mazbata meâlinde mahall-i mezkûrda mu'ayyenü'l-hudûd hâlî ve sâhibli arâzî-i emîriyede kömür ma'deni taharrîsi için Kürd-zade İbrahim Ağa ile Yamalı-zâde Hüsnü Bey nâmına 13 Eylül sene (1)331 tarihinde mer'iyyeti tasdîk edilmiş olan ½ numaralı ruhsatnâmeye müsteniden bi't-taharrî zâhire çıkarılan cevher numûnesiyle harita-i mevki'iyyesi ve fennî raporu bi'l-i'ta ma'denih ihâlesi 19 Nisan (1)333 târîhli arzuhâl ile istid'â edilmiş ve mu'tâ numûnenin lede't-tahlîl yüze nisbeten on altı rutûbet ve ayrıca icrâ edilen bir tahlîle göre yüze nisbeten 38,80 mevâdd-ı tayyâre ve 47,61 kok ve 13,59 ramaddan ibâret ve 61,20 mevâdd-ı sâbiteyi hâvi ve bundan başka üçüncü bir tahlîle göre 6,18 kükürdü hâvi olup 4896 vâhid-i nârî derecesinde olduğu Tahlîlhâne Müdîriyeti'nin raporunda gösterildiğine nazaran şâyân-ı i'mâl linyit kömürü olduğu anlaşılmış ve harita-i mevki'iyyesine nazaran arâzî-i mahsusa şimâlen Sıçanlı Mevki’inde bed' ile Kanalıca Mevki’inde bi'l-mürûr Boyakaraki Mevki’ine Hatt-ı Münkesir şarkan mezkür mevki'den bed' ile Monlapınarı Mevki’inde bi'l-mürûr Yüksektepe'ye hatt-ı münkesir cenûben mezkûr tepeden bed' ile Seyidömer Karyesi Eteği Mevki’inde bi'l-mürur Deveanırdan Mevki’ine hatt-ı münkesir garben mezbur mevki'den bed' ile Aslıhanlı Mevki’inden bi'l-mürûr mebde-i hudûd olan Sıçanlı Mevki’ine hatt-ı münkesir ile mahdûd ve mesaha-i sathiyyesi dört yüz yetmiş yedi cerîbden ibâret bulunan işbu ma'denin i'mâlinde mahzur-ı askerî olmadığı Harbiye Nezâreti'nin 28 Mayıs sene (1)334 târîhli tezkiresiyle izbâr ve yapılan i'lân netîcesinde emr-i ihâleye buraca mu'teriz zuhûr etmediği etmediği gibi mahallince de i'tirâz eden olmadığı livâ-yı mezkûr mutasarrıflığından 22 Ağustos sene (1)334 târîhli tahrîrâz iş'ar edilmiş edilmiş olduğundan bahisle her cerîb arâzi için için senevî on guruş resm-i mukarrer ve ihrâcatında yüzde üç resm-i nisbi ve mezkûr resmlerin yüzde altı nisbetinde techîzât tertibi fermân-ı âlîsinin sudûrunda def'aten ve tamamen tesviye edilmek ve bir def'aya mahsûsan elli bir elli lira fermân-ı âlisinin sudûrusunda def'aten ve tamamen tesviye edilmek olur ise bir gûne zarar u ziyân talebine hakları olamamak şartıyla mezkûr ma'denin doksan dokuz sene müddetle mûma-ileyhimâ İbrahim Ağa ile Hüsnü Bey uhdesine ihâlesine lüzûmu gösterilmiştir. Mustafa UYSAL Araştırmacı-Yazar Kaynakça:” Osmanlı Belgelerinde Kütahya” Sayfa:326-327-328-329